.

Resensie: Dante se mistieke reis. Eerste tog: Inferno

Dante se mistieke reis. Eerste tog: Inferno

Prof. J. S. (Kobus) Krüger: Dante se mistieke reis. Eerste tog: Inferno. Ingelei, vertaal, toegelig, vertolk. Uitgewer: Sentrum vir Mistiek, (Lynnwoodrif, Pretoria), 2013, 355 bladsye. R300, beskikbaar by o.a. Protea Boekhuis. ISBN: 978-0-621-41602-2.

Hierdie boek deur Prof. Kobus Krüger is 'n wonderlike en oortuigende prosa-vertaling van die klassieke werk van Dante. Krüger kry dit reg om die werk histories so te kontekstualiseer dat vandag se leser ingelei word binne die fassinerende wêreld van Dante.

En buiten die ongelooflike bronwerk van Krüger help die nuwe illustrasies deur die kunstenaar Mimi van der Merwe om die leser nog verder in die teks se simboliek en metafore in te trek. (Dit maak natuurlik ook hierdie werk 'n wonderlike versamelstuk.)

Krüger se taalvaardigheid word goed deur die volgende vertaling van Canto XVI.82-85 geïllustreer: "Pero, se campi d'esti luoghi bui e torni a riveder le belle stelle, quando ti giovera dicere 'I' fui', fa che di noi a la gente favelle." ("Dus, as jy weer buite hierdie donker dele kom en omdraai om die mooi sterre weer te sien en wanneer jy verlig sal sê: 'ek was daar!' – vertel dan asseblief die lewendes van ons!")

Hierdie werk maak dat ook ons vandag na Dante se meesterstuk kan luister met ons moderne ore. En alhoewel meeste van die lesers nie Italiaans magtig is nie, word hierdie teks deur Krüger se vertaling in Afrikaans, lewend. En Dante se intensies word duidelik en verstaanbaar.

Hierdie boek is werklik 'n groot aanwins vir Afrikaans en gaan nog vir baie denkers 'n naslaanbron word. Want Krüger verskaf 'n deeglike historiese oriëntering ten opsigte van Dante se persoon en lewe, die politiek, sosiale en ekonomiese agtergrond en konteks. Soos Krüger self daarna verwys met:

"As religieuse digwerk is dit in die geselskap van enkele grotes soos die Gilgamesj-epos, dele van die Ou Testament en die Mahabharata (met insluiting van die Bhagavad Gita) tuis. Dit is die grootste religieuse gedig – die kultuurproduk wat deur 'n enkele mens in die Westerse kultuur- en religiegeskiedenis voortgebring is."

Krüger help die moderne leser om genoeg sleutels te vind om sodoende die teks vir hom- of haarself te kan oopsluit. Die volgende is 'n goeie voorbeeld van so 'n sleutel wat hy gee: "Sy gedig is sy persoonlike mite, gevoed deur eeue se mitologieskepping, in 'n simbool-draende werklikheid, in die groter ruimte van Absoluutheid/Ongrond. Soos by mites die geval is, is daar inderdaad in sy gedig 'n element van ver-beelding, maak (wat nog in die woord 'poësie' uit die Grieks deurklink). Sy gedig is fiksie, dus beperk, maar nie daarom willekeurig of onwaar nie."

Hierdie werk is hoogs aanbeveelbaar. Dit sal jou nie net spiritueel verryk nie maar ook help om dieper te kyk en te verstaan en natuurlik word dit ook 'n visuele fees met Mimi se illustrasies.

Boekwurm

.

Sluit by ons aan

Klik hier om lid te word van die Sentrum vir Eietydse Spiritualiteit. Word per e-pos in kennis gestel en kry afslag op dagkonferensies, kursusse, boeke, DVD's ens.

Dr. Piet Muller: Die Evangelie van Thomas

Die Evangelie van Thomas - met verklarende aantekeninge

Dr. Piet Muller se groot werk, Die Evangelie van Thomas – met verklarende aantekeninge nou op SES in PDF formaat (1.3 MB) of Kindle weergawe (0.5 MB).

DVD: Saam op soek na God

Saam op soek na God

Gewone mense en bekendes word gevra om oor hulle oortuigings en geloof te praat. Vrae soos: Wie is God vir jou?
Het jy enige bewyse van God se bestaan? Ons het gelowiges tot ateïste, new agers tot wikka hekse gaan vra. Die DVD kos R130 maar vir Sentrum (SES) lede net R110.

Stuur vir ons 'n brief

Ons stel belang in jou reaksie en kommentaar op enige gegewe artikel en jou denke rondom die soeke na eietydse spiritualiteit. Besoek asb. hierdie bladsy vir meer inligting.

.

Kopiéreg © spiritualiteit.co.za

.